ਪਟਵਾਰੀਆਂ ਵੱਲੋਂ ਰੱਖੇ ਨਿੱਜੀ ਮੁੰਡਿਆਂ ਨੂੰ ਪ੍ਰਸ਼ਾਸਨ ਵੱਲੋਂ ਕੋਈ ਮੇਹਨਤਾਨਾ ਨਹੀਂ ਦਿੱਤਾ ਜਾਂਦਾ ਪਰ ਉਕਤ ਕਰਿੰਦੇ ਆਲੀਸ਼ਾਨ ਮਕਾਨਾਂ ਦੇ ਮਾਲਕ ਬਣ ਚੁੱਕੇ ਹਨ। ਬਿਨਾਂ ਤਨਖਾਹ ਤੋਂ ਕੰਮ ਕਰਨ ਵਾਲੇ ਪਟਵਾਰੀਆਂ ਦੇ ਨਿੱਜੀ ਮੁੰਡਿਆਂ ਕੋਲ ਖੁਲ੍ਹਾ ਪੈਸਾ ਅਤੇ ਵੱਡੀਆਂ ਗੱਡੀਆਂ ਹੋਣ ਤੋਂ ਸਾਫ ਪਤਾ ਚਲਦਾ ਹੈ ਕਿ ਇਨ੍ਹਾਂ ਵੱਲੋਂ ਕਿੰਨਾ ਭ੍ਰਿਸ਼ਟਾਚਾਰ ਫੈਲਾਇਆ ਜਾਂਦਾ ਹੈ। ਇਸ ਤੋਂ ਇਲਾਵਾ ਅਜਿਹੇ ਵੀ ਕਈ ਪਟਵਾਰੀ ਹਨ, ਜਿਹੜੇ ਪੱਲਿਓਂ ਤਨਖਾਹ ਦਿੰਦੇ ਹਨ, ਜੋ ਹੈਰਾਨੀਜਨਕ ਤੱਥ ਪੇਸ਼ ਕਰਦਾ ਹੈ। ਪਟਵਾਰੀਆਂ ਵੱਲੋਂ ਰਖੇ ਪ੍ਰਾਈਵੇਟ ਵਿਅਕਤੀਆਂ ਨੂੰ ਸਰਕਾਰ ਵੱਲੋਂ ਕੋਈ ਮਾਨਤਾ ਨਹੀਂ ਦਿੱਤੀ ਗਈ ਹੈ। ਬਹੁਤ ਸਾਰੇ ਮਾਲ ਪਟਵਾਰੀ ਇਨ੍ਹਾਂ ਰਾਹੀਂ ਜ਼ਿਆਦਾਤਰ ਰਿਸ਼ਵਤਖੋਰੀ ਦਾ ਧੰਦਾ ਚਲਾਉਂਦੇ ਹਨ। ਵਿਜੀਲੈਂਸ ਵਿਭਾਗ ਅਨੁਸਾਰ ਪ੍ਰਾਈਵੇਟ ਕਰਿੰਦੇ ਪਟਵਾਰੀ ਦੀ ਜਗ੍ਹਾ ਰਿਸ਼ਵਤ ਲੈਂਦੇ ਹਨ ਅਤੇ ਜਦੋਂ ਟਰੈਪ ਲਗਾਕੇ ਵਿਭਾਗ ਕਾਰਵਾਈ ਪਾਉਂਦਾ ਹੈ ਤਾਂ ਬਰਾਮਦਗੀ ਨਿੱਜੀ ਮੁੰਡਿਆਂ ਕੋਲੋਂ ਹੋਣ ਕਾਰਨ ਪਟਵਾਰੀ ਸਾਫ ਬਚ ਨਿਕਲਦੇ ਹਨ ਅਤੇ ਮਾਨਯੋਗ ਅਦਾਲਤਾਂ ‘ਚ ਪਟਵਾਰੀ ਖਿਲਾਫ ਕਾਰਵਾਈ ਅਮਲ ‘ਚ ਲਿਆਉਣਾ ਵੀ ਮੁਸ਼ਕਿਲ ਸਾਬਤ ਹੁੰਦਾ ਹੈ, ਜਦਕਿ ਰਿਸ਼ਵਤ ਦਾ ਸੂਤਰਧਾਰ ਪਟਵਾਰੀ ਹੀ ਹੁੰਦਾ ਹੈ। ਇਸ ਸੰਬੰਧੀ ਡਿਪਟੀ ਕਮਿਸ਼ਨਰ ਵਰਿੰਦਰ ਕੁਮਾਰ ਸ਼ਰਮਾ ਨੇ ਕਿਹਾ ਕਿ ਪਟਵਾਰੀਆਂ ਨੂੰ ਨਿੱਜੀ ਮੁੰਡੇ ਨਾ ਰੱਖਣ ਸੰਬੰਧੀ ਸੁਚੇਤ ਕੀਤਾ ਗਿਆ ਹੈ ਪਰ ਜੇਕਰ ਫਿਰ ਤੋਂ ਪਟਵਾਰੀਆਂ ਨੇ ਅਜਿਹੀ ਕਿਸੇ ਕਾਰਵਾਈ ਨੂੰ ਅੰਜ਼ਾਮ ਦੇਣਾ ਸ਼ੁਰੂ ਕਰ ਦਿੱਤਾ ਹੈ ਤਾਂ ਉਨ੍ਹਾਂ ਖਿਲਾਫ ਸਖਤ ਕਾਰਵਾਈ ਅਮਲ ‘ਚ ਲਿਆਂਦੀ ਜਾ ਸਕਦੀ ਹੈ।